【移民英國】買樓租樓點揀好？移民前必睇小貼士 - 雅虎香港新聞

telsaroadster.blogspot.com

上集講過想移民英國的話地區點㨂好，揀好地區之後另一重大決定當然係住屋問題。今次唔係同大家講邊區樓盤好，因為網上有唔少英國物業網資料更詳細所以呢度唔詳述，亦唔教大家點睇樓驗樓，想知可以睇返之前嘅介紹文章（按這裡）；今次講下大家決定租樓定買樓前要知嘅小貼士，及決定咗之後應該要準備嘅過程。

租樓要查家宅？

大家要知道，英國政府對租客保障極為全面，雖然聽落好似好理想，但變相產生另一個問題，就係業主出租前一定要查足租客家宅，因為不幸遇上租霸的話隨時會搞1年半載都未收得返間屋，想租樓就一定要確保自己做足以下措施。首先透過業主或經紀聯繫之後，通常都要填一張背景資料表，通常包括過去5年嘅工作經驗、人工、銀行戶口等，如果閣下有工返仲要填上公司老闆聯絡方法。唔好以為只係做下樣，對方係真係會去Check資料，目的都係確保你能力可以支付租金，唔會走數。如果你未有工作，銀行戶口要提供現金證明，表明自己有能力繳交至少一年租金，並多數要一次過支付一年租金。租約期方面，由半年、一年、兩年都有，最長可以一次直接簽7年。

條款細則大不同

所謂各處鄉村各處例，去到英國租屋唔好睇少嘅細則條款，因為有好多都同香港唔同。首先要注意有一稅項名為Council Tax（房屋稅），由當區市政府向業主徵收，租樓前要講清楚租客畀定業主畀，不過按慣例9成都係租客支付，唔好睇少呢個稅，可以每個月畀多100英鎊㗎！另外就係租金支付期，係每星期（PW）定係每個月（PCM）；繼而係按金，1至3個月不等，視乎你同業主點傾。然後就係傾好水、電、上網費由邊個支付。2019年起於英國本島英格蘭實施新條例，業主除咗以下費用之外，一律不得額外向租客收取其他款項：租金、水費、電費、天然氣、暖氣、上網費、Council Tax、按金、保留費（即簽約前幫你Hold起間屋，最多為一星期租金，必須退還）、合約更改費用最高50鎊、租客提前解約費用、租客因房屋受損賠償費用。

其他注意事項

除咗上述細則，另外有啲無明文嘅條款都為概定細則，包括業主或經紀都有門匙，只要24小時前通知租客就可以開門入屋檢查，租約屆滿前更可帶未來租客上門睇樓。如果有事離開屋企兩星期或以上，需要通知業主或經紀。如果發現屋內有任何問題或物件、家電損毀，請第一時間通知業主或經紀，唔好嘗試自己整或搵人整，否則如果因此有更大損失，租客要一力賠償。

買樓有Cash有優勢

如果閣下決定買樓，已經揀啱心水又聯絡咗經紀之後，就開始漫長手續，因為英國買樓手續繁複，比香港更甚。首先當然係講「錢」，英國買樓好注重有無Cash Buyer，即係全數現金支付，如果你係全數現金支付的話，已經可以有條件殺價，甚至壓一至兩成都有人試過。而且Cash Buyer比較受業主歡迎，就算賣價一樣，業主會寧願賣畀Cash Buyer多過要借銀行錢嘅買家。不過當然你要出示銀行戶口結餘，證明你確實有該筆Cash可用啦。如果要借按揭，當然要自己搵銀行按揭經紀，大家有所不知，其實可以透過香港銀行做按揭一樣得，本地有部分銀行提供英國買樓按揭，最多借7成，最長分30年還款，當然同樣要通過本地壓測；同埋留意本地銀行估價，多數未必估足，要預多少少現金準備。如果用英國銀行按揭就要注意，英國最高按揭7成半（倫敦只有6成），而且審批極難，如果係移民又未有工返的話，幾乎無可能借足，而且就算借到，之後還款利息亦會比本地人高。